Навивачот на Челзи Колин Винг, кој беше обвинет за расистички навреди кон напаѓачот на Манчестер Сити Рахим Стирлинг негираше дека го навредувал англискиот репрезентативец.
60-годишниот Винг изјави во интервју за „Дејли Меил”, дека го користел зборот „Manc”, со што се карактеризираат луѓето од Манчестер, а не „black” (црн) на адреса на Рахим Стирлинг.
„Сакам да се извинам најискрено на Рахим. Разочаран и засрамен сум од однесувањето. Тоа не беше расистички, но и покрај тоа не беше правилно. Знам дека псовката е лоша работа, но ја бев изгубил контрола. Од 50 години наваму ги посетувам натпревари на Челзи и секогаш седам зад голот, па често влегувам ва кадар. Ако користев такви зборови, некогаш некоја камера ќе ме фатеше досега “, рече Винг.
Поради своето однесување во текот на натпреварот, Винг исто така мораше да се збогува со својата работа и сезонски билет за натпреварите на Челзи.