Македонија ја оствари целта и ќе биде дел од уште едно големо натпреварување, Европското првенство кое наредната ќе година ќе се одржи во четири земји Бугарија, Финска, Италија и Романија.
Ова за машката одбојкарска репрезентација ќе биде четврти европски шампионат во низа што е огромен успех и резултат, па ветеранот Владо Милев се надева дека токму на првенството наредната година ќе се прикажат во најдобро издание и ќе ја заокружат приказната на оваа генерација.
-Не можам да бидам незадоволен, ова четврто ЕП ќе биде круна на оваа наша генерација, бидејќи сметам дека дел од нас сме на залезот на нашите кариери.
-Ова ЕП го отвара патот на помладите да продолжат по нашите стапки, да се негува одбојката како спорт, да се одржи нивото и од година во година да го креваме нивото како на клупската така и на репрезентативната одбојка. За нас е голем успех овој пласман и се надевам ќе го прикажеме најдоброто на ЕП, -вели Милев.

