Македонската репрезентација до 21 година ги започна подготовките за новиот предизвици во квалификациите за ЕП. Нашата селекција новиот квалификациски циклус за пласман на ЕП 2027 го започнува со гостување во Полска на 5. септември, а потоа на 9. септември во Битола ќе ја пречека Италија.
Фудбалерите на Горан Станиќ во првите две кола ќе се соочат со фаворитите во групата, што за нас е само дополнителна мотивација. Младите надежи на стадионот „Борис Трајковски“ го одработија првиот тренинг.
Еден од нашите репрезентативци Матеј Гаштаров доби повик во репрезентацијата, а пред овие средби вели:
„Нормално е да се надеваме на големи работи и борба за првите места на табелата. Имаме голем предизвик пред себе, играме против две многу сериозни и квалитетни репрезентации, Полска и Италија. Ние, од друга страна, како генерација имаме многу квалитет и голем мотив да одиграме најдобро. Одлично се подготвуваме и секогаш сме среќни кога сме дел од националниот тим, што е многу важно за тимскиот дух. На тренинзите и на натпреварите се чувствува сплотеност и желба, а тоа многу значи. Одиме да се надигруваме со сите, одиме да победуваме и да им донесеме радост на навивачите“, изјави Матеј Гаштаров.
FOTO: ffm.mk

