Македонската фудбалска репрезентација од синоќа се наоѓа во Белгија (Гент) каде утре од 20.45 часот треба да го одигра следниот натпревар од квалификациите за СП 2026 година. Нашите репрезентативци ќе се обидат да направат изненадување на теренот на фаворитот од нашата група и со тоа да продолжат да го сонуваат сонот за пласман на СП.
Според планот избраниците на селекторот Милевски вечерва од 19.30 часот ќе го одработат официјалниот тренинг пред утрешниот натпревар, а пред тоа во 18.45 часот ќе ја одфржат и задолжителната прес-конференција.
Македонија и Белгија утре ќе го одиграат шестиот меѓусебен натпревар. Нашиот национален тим никогаш не ја победил Белгија, но има два реми исходи, кои се врежани во нашата историја. Покрај трите белгиски победи, нашите фудбалери ремизираа во Брисел пред три децении (1:1) и во јуни годинава во Скопје (1:1).
На пет одиграни натпревари нашата селекција постигнала само два, а примила десет погодоци. Натпреварот во Гент е голема шанса на оваа генерација да ја продолжи низата позитивни резултати и да се направи чекор понапред кон историски успех.

