Скандалот во Турција околу нелегалното обложување на фудбалски натпревари расте. Вкупно 1.024 играчи од сите локални лиги се обложувале, поради што се привремено суспендирани и упатени до дисциплинската комисија на Турската фудбалска федерација (ТФФ). Локалниот синдикат ги објави имињата на сите играчи.
Меѓу нив се и оние од гигантите Галатасарај и Бешикташ. Репрезентативецот на Турција, Ерен Елмали, беше суспендиран од националниот тим, а на негово место беше повикан Мустафа Ескишелач од Трабзонспор. Неговиот соиграч Метехан Балтачи е исто така на списокот, а од Бешикташ долгогодишниот капитен Неџип Ујсал, како и голманот Ерсин Дестаноглу.
Во соопштението на Федерацијата се наведува дека сите 1.024 играчи се казнети според член 57 од прописите на ТФФ, кој им забранува на спортистите да се обложуваат на фудбалски натпревари. Играчите се соочуваат со забрана од три месеци до една година од фудбалските натпревари.
Поради обемот на случајот, претставници на ТФФ изјавија дека ќе побараат дозвола од ФИФА за отворање посебен 15-дневен преоден рок во кој клубовите би можеле да ги заменат суспендираните играчи. Федерацијата, исто така, ги одложи сите натпревари од втората и третата лига за две недели, но потврди дека натпреварите од Супер лигата и Првата лига ќе се одржат според закажаното.
Неодамна, претседателот на Турската фудбалска федерација, Ибрахим Хаџиосманоглу, откри за медиумите во земјата дека 371 од 571 судии кои судат натпревари во професионалните лиги имале сметки за обложување на веб-страници за обложување, а 152 од нив активно се обложувале. Набргу потоа, федерацијата суспендираше 149 судии и помошници судии и издаде налози за апсење на 17 судии и претседателот на прволигашот Ејупспор, Мурат Озкаја. Тој, заедно со уште осум други лица, остануваат во притвор откако беа испрашувани.

