Фудбалската репрезентација на Македонија го одигра контролниот натпревар против Летонија, а дуелот во Скопје на Арената „Тодор Проески“ заврши со резултат 0:0.
Овој тест-натпревар беше увертира за мечот против Велс во Кардиф, кој ќе одлучи кој ќе биде второпласиран во групата од квалификациите за СП 2026, позиција која носи и повеќе поволна позиција во баражот за настап на СП во САД, Канада и Мексико.
Селекторот Милевски дуелот го почна со мешан состав. Немаше неколку носители во играта во првиот тим, на нивно место играа Ашковски, Стојчевски, Растодер, Ристовски и други. Дуелот почна со многу жестоки дуели, без многу шанси и конкретни закани.
Се чекаше на првиот обид до 24. минута, кога Гутковскис се закани, но само над голот. Само три минути подоцна, во 27. минута, одлична шанса за гол имаше Тихомир Костадинов кој биеше со глава, но голманот Матревиц одбрани. Пред финишот на првиот дел одлична шанса имаше и Никола Серафимов кој биеше со глава, а голманот Матревиц беше на висината на задачата. Во вториот дел Милевски направи измени, во игра ги внесе Ќамили, Трајковски, Миовски, Елмас и Рамадани. На првата шанса се чекаше до 58. минута кога Растодер имаше добар шут откосо, но голманот на Летонија одбрани.
Во продолжението од мечот, Македонија беше поактивна, имаше неколку полушанси за гол, но немаше добра завршница. Ова е првпат Летонија да остане непоразена против Македонија, откако нашиот национален тим претходно забележа пет победи на пет меча на дуелите меѓу овие две селекции.

