Манчестер Сити потврди дека Јошко Гвардиол има фрактура на десната тибија (коска на потколеницата на десната нога) и ќе биде подложен на операција во текот на оваа недела.
Од „Етихад“ не прецизирале колку долго ќе отсуствува, но според англиските медиуми, постои сериозен ризик сезона за него да заврши. Во Хрватска постојат стравувања дека централниот дефанзивец можеби нема да може да се опорави на време за Светското првенство.
Хрватскиот портал „24sata“ истакнува дека овие повреди обично бараат помеѓу 4 и 6 месеци, а во потешки случаи периодот на опоравување може да се зголеми на 9 до 12 месеци.
Самиот Гвардиол увери на социјалните мрежи дека овој тежок период нема да го скрши и дека ќе се врати посилен, заблагодарувајќи се за поддршката.
Кадровската криза во одбраната веројатно ќе го принуди Манчестер Сити да бара нов играч за време на јануарскиот преоден рок.

