Одбојкарската федерација на Македонија денеска на средба со новинарите ја најави завршницата на Купот во машка и женска конкуренција која ќе биде реализирана од утре до сабота во СЦ Јане Сандански.

Генералниот секретар на ОФМ, Филип Деспотовски и претставниците на сите осум екипи, по четири во двете конкуренции, изразија задоволство што целиот настан повторно ќе биде реализиран во престолнината со атрактивна одбојка. Според програмата, утре ќе бидат одиграни полуфиналните мечеви кај одбојкарките. Од 17.30 часот екипата на Газели Волеј ќе игра со Вардар Ем додека од 19.30 ќе биде финалето пред финале меѓу Наковски Волеј и Младост УГД.

Одбојкарите ќе истрчаат в петок и тоа во првиот термин Штип ќе игра со Струмица а во вечерниот од 19.30 часот, Борец ќе игра со Работнички. Финалните мечеви за победничкиот пехар во Купот во двете конкуренции ќе бидат одиграни в сабота. Женското финале е во 17.30 а машкото два часа подоцна.

