Еурофарм Пелистер приреди големо изненадување во четвртото коло од Европската лига на ЕХФ, совладувајќи го германскиот Гумерсбах по вистинска ракометна драма во салата „Боро Чурлевски“ во Битола.
Битолчани успеаја да се издигнат по исклучително тешкиот почеток и да направат голем пресврт против еден од најквалитетните германски состави. Победата има огромно значење за македонскиот вицешампион, кој пред овој натпревар имаше само еден освоен бод и се наоѓаше на последното место во групата.
Тимот на Лино Червар покажа карактер, борбеност и верба во сопствените можности, а поддршката од битолската публика беше дополнителен мотив во најважните моменти од средбата.
Овој триумф ги враќа Пелистерци во игра за пласман во следната фаза, во конкуренција на Гумерсбах, полскиот Вибжеже Гдањск и шпанската Ла Риоха.
Поразот од 10 гола разлика во првиот меѓусебен дуел во Германија сега добива сосема поинаква димензија – битолчани покажаа дека можат да се надигруваат и со фаворитите.

