Поранешниот шпански репрезентативец и напаѓач на Ливерпул, Челзи и Атлетико Мадрид Фернандо Торес најави крај на својата кариера. 35-годишниот фудбалер кој во моментов игра за јапонскиот Саган Тошу ја објави веста преку социјалните мрежи.
„Морам да ви кажам нешто многу важно. По 18 возбудливи години, дојде време да се стави крај на мојата фудбалска кариера. Следна недела, 23-ти, во 10 часот по јапонско време, ќе одржам прес-конференција за медиумите во Токио, каде што ќе ги објаснам сите детали. Ќе се видиме таму”, напиша Фернандо Торес.
https://twitter.com/Torres/status/1141934249362124801
Шпанскиот напаѓач имаше одличен настап на „Енфилд“ по пристигнувањето од Мадрид во 2007 година. Тој постигна 81 гол во 142 натпревари за Ливерпул, пред да се пресели кај ривалот Челзи. Неговата форма не беше иста кај „сините“ и покрај тоа што ја освои Лигата на шампионите, Лигата на Европа и ФА Купот како играч на „Стемфорд Бриџ“.
Фернандо Торес одигра 110 натпревари за репрезентацијата на Шпанија и со 38 гола дојде до третата позиција на голгетерската ранглиста на сите времиња за Шпанија по Давид Виља и Раул. Торес двапати во кариерата беше дел од Атлетико Мадрид, а играше и на позајмица во Милан. Фернандо Торес, роден во Мадрид, а бил светски шампион и двапати европски шампион.
Повлекувањето на Торес од фудбалот предизвика бран на коментари меѓу навивачите.
„Ние секогаш ќе те сакаме”, напишал навивач на Челзи на „Твитер“. „Европски крал. Благодарам за спомените Ел Нињо”, додаде друг навивач на Челзи. „Многу среча во иднина Ел Нињо. Еден од моите омилени играчи на сите времиња “, додаде навивач на Ливерпул.

