Тренерот на италијанската младинска екипа остана без својата работа бидејќи екипата што ја водеше го совлада својот противник со 27:0. Според раководството на клубот, ова било манифестација на непочитување на противникот и лош пример за воспитување на децата.
Се работи за клубот Инвиктазауро од градот Гросето, кој преставува фудбалско училиште за деца во соработка со Фиорентина. Една од младинските екипи ги совлада своите врсници од Марина Калчо со 27:0. Сепак, ова не им се допадна во клупското раководство.
„Бевме шокирани и разочарани кога слушнавме дека нашата јуниорска екипа го совладала ривалот со 27:0“, рече претседателот Паоло Брогели.
„Нашите училишни вредности не се преклопуваат со такво нешто. Противникот секогаш мора да се почитува, но тоа не се случи денес. Како претседател, искрено се извинувам на ФК Марина Калчо. Исто така објавувам дека директорите на клубот едногласно решија да го отпуштат тренерот Ричини. Нашите тренери имаат задача да ги тренираат младите играчи, но пред сè, тие треба да ги воспитуваат. Тоа не се случи денес“, се вели во изјавата на претседателот Брогели.

