Само два дена му беа потребни на Атлетико Мадрид да го реализира трансферот на летото во Ла Лига. Од синоќа Луис Суарез е нов фудбалер на овој мадридски клуб и денес со посебна церемонија и прес-конференција од 12:30 часот Суарез ќе се прости од Барселона пред раководството на клубот и неговите досегашни соиграчи.
Третиот најдобар стрелец во историјата на Барселона заминува по пет сезони поминати од „Камп Ноу“ и за разделбата на една година пред истекот на договорот каталонскиот клуб ќе добие шест милиони евра во вид на бонуси. 33-годишниот напаѓач ќе добие двегодишен договор сп новиот клуб и ќе добива девет милиони евра по сезона. Суарез ќе ја добие деветката која досега ја носеше Алваро Мората кој се врати повторно во Јувентус. Диего Симеоне планира да го продаде и Диего Коста со што ќе му ослободи простор во нападот на Луис Суарез. Атлетико Мадрид го потврди трансферот, но го услови со лекарските прегледи кои денес Уругваецот треба да ги мине во Мадрид.
Со ова во Барселона се ослободувааат од високата плата од 17 милиони евра која ја имаше Суарез, а тоа значи дека ќе можат да влезат во финални преговори за ангажманот на Мемфис Депај од Олимпик Лион.

