Бразилската sвезда на ПСЖ, Нејмар најверојатно ќе се врати на терените во јануари, откако се здоби со повреда на скочниот зглоб за време на мечот со Олимпик Лион минатиот викенд, објави францускиот шампион.
Плејмејкерот, кој пристигна од Барселона, претходно претрпе сериозни повреди на ногата во 2018 и 2019 година. На натпреварот со Лион, тој беше фотографиран со солзи во очите откако имаше старт над него од Тиаго Мендеш од Лион со двете нозе и заработи црвен картон за неговиот старт.
„Откако се виде дека има изместен лев скочен зглоб, следното нешто што го очекуваме е да поминат модринките и да почне со рехабилитација и движење“, се вели во официјалното соопштение на ПСЖ и додаваат дека се очекува тој да се врати на терените во јануари.
Веста значи дека Нејмар ќе се опорави на време за мечот на Парижаните против неговиот поранешен тим Барселона од осминафиналето во Лигата на шампионите, што е во вториот месец од следната година. Утре ПСЖ ќе игра со лидерот во Лига 1, екипата на Лил, а Нејмар е во групата на повредени заедно со Пабло Сарабија, Мауро Икарди, Абду Диало, Хуан Бернат и Данило Переира.

