Остануваат уште само неколку дена до почетокот на пролетниот дел од сезоната во ПМФЛ, а фудбалерите на Вардар во недела имаат прв натпревар и тоа против Пелистер на домашен терен.
Благодарение на одличната акција „Куки билет за спас на Вардар“ организирана од навивачите на Вардар – Комити, фудбалерите ќе имаат можност да ја почуствуваат поддршката од навивачите пред продолжението од сезоната. Оваа акција кој сеуште трае, треба да биде само импулс за решавањето на проблемите во нашиот најтрофеен фудбалски колектив.
Од она што го имамме како информација, по реализацијата на самата акција и извонредниот однос кој го имаат навивачите и фудбалерите, од утре самите играчи ќе започнат со тренинзи и подготовка за првиот натпревар со Пелистер. Вардар веќе го ангажираше поранешниот селектор на Македонија, Никола Илиевски-Џиџи кој со сите играчи кои останаа во клубот ќе треба да се избори за опстанок во ПМФЛ. Неофицијално досега благодарение на акцијата на навивачката група Комити продадени се над 15.000 влезници за средба со Пелистер, а се очекува таа бројка да биде и над 20.000 влезници.
Денес стигна и уште една добра вест за средувањето на состојбите во Вардар, а тоа е дека Владата на својата седница донела одлука за бришење на каматите кои Вардар ги должи кон ПУИГ во висина од 60.000 евра, но исто така е договорена итна уплата од околу 100.000 евра кои треба да му помогнат на Вардар за консолидација.
„Со ова и вклучувајќи ги средствата од акцијата на навивачката група Комити и средствата од следниот ваучер, ФК Вардар ќе има на располагање околу 350.000 евра потребни за завршување на сезоната. Со тоа ќе бидат исполнети услови и „купено време“ за целосно решеавање на проблемите на ФК Вардар“ ни изјави Драган Томовски кој ги повикува сите кои не купиле билет во акцијата „Спас за Вардар“ тоа да го направат до неделниот натпревар.
Сега останува фудбалерите на Вардар да дадат се од себе за да се подготват за средбите кои следуваат и со своите настапи и игри му овозможат на својот клуб да остане во прволигашкото друштво.
