Вчера беше еден од најважните денови на Барселона и нејзината иднина, беа одржани изборите за нов претседател кој во овие тешки моменти на клубот треба да ја врати екипата во вистинскиот колосек. Иако во ковид-услови, шпанскиот гигант по овие избори доби нов претседател.
Од денес, со клубот ќе раководи Жоан Лапорта, тој е повратникот на позицијата прв човек на Барселона. 58-годишниот адвокат, веќе беше претседател на Барселона во периодот од 2003 до 2010 година.
Лапорта во овој свој мандат го водеше клубот со многу успех, а беше на чело кога Барса освои најмногу титули (шест) во една сезона во 2009. На претседателските избори Лапорта како конкуренти ги имаше Антони Фреикса и Виктор Фонт, но гласачкото тело сепак се реши да му даде доверба на веќе испробано име. На изборите во Барселона, Лапорта победи со огромна предност пред противниците, зад себе имаше 57.61% од гласовите, додека зад него беше Фонт со 31.65%, а Фреикса освои само 9,45%.

Еден од првите приоритети на Жоан Лапорта во следните четири години ќе биде како да ја задржи првата ѕвезда во екипата Лионел Меси, едно од неговите главни ветувања кое треба да го исполни.

