Нова тревна подлога беше поставена на „Стад де Франс“ пред финалето на Лигата на шампионите меѓу Ливерпул и Реал Мадрид во сабота, објави АФП.
Самото поставување на тревата траеше точно 48 часа, бидејќи беше „одгледана“ во близина на Барселона и донесена во француската престолнина со неколку камиони. На стадионот со трактори се истоварени 500 ролни трева, од кои секоја тежи од 750 до 1.000 килограми. Секоја ролна шпанска трева е долга 15 метри и широка 1,20 метри. Тревната покривка внимателно се одгледува од ноември во посебен парк северно од Барселона. Стариот тревник беше отстранет веднаш по финалето на Купот на Франција, во кое Нант на почетокот на мај ја победи Ница со 1:0.
„Тоа е огромен логистички предизвик“, рече Лоик Дурозел, директор на Стад де Франс, кој рече дека работата е завршена за два дена наместо за пет. Интересно, природната тревна покривка беше поставена на синтетички тепих. „Не смееме да заборавиме дека има 5 % синтетика, но 95 % е трева“, вели Енди Кол, Британец кој е еден од најдобрите специјалисти за трева и кој во Париз се грижи за теренот.
Се треба да биде подготвено пред тренинзите на двете екипи во петок.
„Реал Мадрид ќе сака да игра на трева висока помеѓу 20 и 23 милиметри. Колку е помала тревата, толку побрзо ќе се движи топката. Но на крајот УЕФА ќе одлучи, висината на тревата ќе биде околу 24-25 милиметри“, предвидува Беноа Лавале, програмски директор на Стад де Франс.
Новата трева ќе остане на „Стад де Франс“ само еден месец, а покрај финалето од Лигата на шампионите, таму ќе игра и француската фудбалска репрезентација, како и финалето за шампионатот во рагби. Теренот потоа ќе биде премотан и преместен на стадионот во Ле Ман, каде што ќе остане четири или пет години. Целата операција чини меѓу 300.000 и 500.000 евра.

