Фудбалската репрезентација на Македонија стартува новиот циклус во Лигата на нациите, а нашите репрезентативци сакаат да направат уште еден голем успех и да се пласираат на ЕП 2024. Прв предизвик за селекцијата ќе биде Бугарија со која играме вечерва од 18:00 часот, дуел во кој Македонија влегува со голема самодоверба.

Зад Македонија е период од нешто повеќе од 1 година во која се случија многу убави работи за репрезентацијата и фудбалот во нашата земја. Победата над Германија, настапот на ЕП 2020, обезбеденото место во баражот за СП 2022 и големата победа над Италија (0-1) се само дел од работите кои оваа генерација ги направи, а беше предводена најнапред од Игор Ангеловски, па подоцна од Благоја Милевски.
Во овие натпревари од Лигата на нации влегуваме со мал хендикеп затоа што ќе ги немаме Аријан Адеми поради замор, Стефан Ристовски поради повреда, уште неколку играчи кои недостасуваат исто така поради повреди, па селекторот Милевски мораше да го подмлади составот.
Има тројца дебитанти во А-тимот, Бојан Димоски од Академија Пандев, Енис Фазлагиќ од Висла Краков и Томче Гроздановски од Злате Моравце. Поради напорниот распоред и четирите меча во десет дена, се очекува сите фудбалери да добијат минутажа, но секако на некој од следните натпревари.
Она што е важно за денешниот натпревар е што во средниот ред ќе ги имаме – новиот капитен Енис Барди (во отсуство на Ристовски) и Елиф Елмас од Наполи. Селекторот на Бугарија, Јасен Петев исто така има промена во составот, нема евидентни ѕвезди како во минатото. Повеќето играчи се од домашното првенство, доминираат имињата од Левски Софија, а како најопасен може да се издвои Кирил Десподов од бугарскиот првак Лудогорец кој сезоната ја заврши со десет гола и дури осумнаесет асистенции.
Македонија и Бугарија досега немаат одиграно официјални средби. Ова ќе биде прв официјален натпревар ппод капата на УЕФА, досега имаме одиграно само пријателски натпевари и тоа вкупно седум. Бугарите имаат четири победи, Македонија славеше двапати, додека еден дуел заврши нерешено.
Натпреварот вечерва се игра во Разград, а нашиот противник нема победа на последните четири средби и можеби затоа не сметаат за благи фаворити на оваа средба.

