Младата репрезентација на Македонија до 19 години одигра одличен квалификациски турнир во Полска и го освои второто место успевајќи да се пласира во елитната рунда квалификации за пласман на ЕП во конкуренција на големите фаворити Германија и домаќинот, Полска.
Селекторот Тони Јакимовски по остварениот успех, вели дека ова беше едно силно натпреварување со моќни селекции.
„Честитки до моите фудбалери кои одиграа одличен турнир во Полска. Не беше воопшто лесно да се игра против силните и моќни репрезентации на Германија и Полска. Потајно се надевавме дека можеме да оствариме успех и покрај тешката група во која се наоѓавме. Во првото коло од квалификацискиот турнир, одигравме фантастичен меч против домаќинот, селекцијата на Полска, во кој успеавме да забележиме сосема заслужена победа. Имаме доволно време да се подготвиме за елитната фаза квалификации кои се во март. Ќе одработиме подготовки, не очекуваат и неколку пријателски средби во кои ќе ја темпираме формата за предизвикот што не очекува во следната фаза од квалификациите“, вели Јакимовски.

