Македонската фудбалска репрезентација овој јуни ќе го искористи за одигрување на пријателски-контролни натпревари, а овој пат целта не е иста како онаа од пред три години – кога се подготвуваа за историскиот настап на Европското првенство. Нашата најдобра селекција во следниот период ќе одигра два контролни натпревари со кои ќе ја заврши оваа сезона. Прв ривал ни е селекцијата на Хрватска, а потоа силите ќе ги одмериме со Чешка, селекции кои што се учесници на претстојниот Европски фудбалски шампионат.
Селекторот Благоја Милевски јунските натпревари ќе ги искористи за нова проверка на силите и квалитетите на поединци, а најверојатно и за нови комбинации во неговиот тим пред стартот на новата сезона во Лигата на нации. Последните натпревари кои ги одигравме беа исто така контролни и ремизиравме со Молдавија (1:1), а минимално загубивме од Црна Гора.
Сега, пред нашите репрезентативци се натпревари со далеку посериозни предизвици од оние во март. Хрватска скоро една деценија е при самиот врв на светскиот фудбал, тоа го докажа и на последното Светско првенство на кое заврши како трета, а ова Европското првенство ќе биде посебно – бидејќи за неколку ѕвезди во репрезентацијата на Хрватска ова ќе биде последно големо натпреварување. Поради тоа, селекторот Златко Далиќ за вечерашниот натпревар со Македонија ќе се определи на дел од искусните играчи им даде одмор,а шанса да добиејат помладите.
Квалитетот и фаворитската улога е на страна на селекцијата на Хрватска, а посебно тоа што Македонија за оваа средба ќе биде без својот капитен Енис Барди, кој има повреда на рамото.
Натпреварот во Ријека на стадионот „Рујевица“ започнува во 19 часот.

