Со натпреварот меѓу Манчестер Јунајтед и Фулам вечерва почнува новата сезона во англиската Премиер лига. „Црвените ѓаволи“, кои го загубија градското дерби на „Комјунити Шилд“ купот од Манчестер Сити пред помалку од една недела, ќе се надеваат дека овојпат ќе го започнат својот првенствен поход со добар почеток и три освоени бода на домашен терен. Новото раководство ги потврди своите амбиции, откако досега доведе четворица играчи кои треба да дадат нова крв во составот на Тен Хаг, кој ја доби довербата да го поведе тимот и во новата сезона. Доаѓањето на Џошуа Циркзе, Лени Јоро, Матијас Де Лигт и Нусаир Мазрауи за кои потрошија речиси 150 милиони фунти, треба да го покажат новото лице на „црвените ѓаволи“.
Фаворити за титулата остануваат оние кои за трофејот се бореа до крајот и минатата сезона – Манчестер Сити и Арсенал. Има многу шпекулации дека оваа сезона би можела да биде последна за Пеп Гвардиола на клупат ана Сити, што дополнително ќе биде притисок и за него за трофејно завршување на престојот во Англија. Арсенал минатата сезона до последно се бореше со Манчестер Сити за титулата, а „топчиите“ ќе бидат главни ривали на „граѓаните“ и оваа сезона. Навивачите на „топчиите“ се уверени дека во последните две сезони тимот го стекнал потребното искуство за да се направи последниот чекор до титулата.
Големо прашање е како Ливерпул ќе изгледа во својата прва сезона по завршувањето на ерата на Јирген Клоп. По речиси девет години на „Енфилд“, харизматичниот Германец реши да се откаже, а на негово место дојде Арне Слот, кој забележа импресивни резултати во претсезоната. Поради ова обложувалниците го ставија Ливерпул на третото место меѓу фаворитите.
Во битката за топ 4, сигурно повторно ќе учествуваат Астон Вила, Челзи, Тотенхем, Њукасл и Вест Хем, кои имаат амбициозни состави.

