Фудбалската репрезентација на Македонија успеа д аслави на домашен терен против селекцијата на Ерменија со 2:0 во второто коло од Лигата на нациите, резултат со кој се искачи на првото место на табелата во новото издание на натпреварувањето на УЕФА. По разочарувачките 1:1 во Торшавн со Фарски Острови, нашите фудбалери дојдоа до победа која е доста важна.
Дополнително, се добива на тежина затоа што таа е извојувана со играч помалку цело второ полувреме. Милевски го започна мечот со неколку промени, но проблем на стартот на мечот беше повредата на Чурлинов. Во првото полувреме имавме неколку шанси преку Елмас и Давид Бабунски, но без реализација.
Во последните секунди од полувремето Македонија остана со десетмина на теренот, откако поради приговор беше исклучен Ѓоко Зајков. Стоперот имаше жолт картон и протестираше на одлука за еден старт на Ќамили, па судијата Осмерс му го покажа патот кон соблекувалната.
Во второто полувреме Македонија играше со играч помалку, евиднетно беше дека нема да биде лесно. Првата сериозна шанса ја имавме во 62. минута кога Елмас влезе во казнениот простор, па го проигра Миовски, а тој испрати доба удар, но беше изблокиран и топката заврши во корнер.
Милевски во игра ги внесе Костадинов и Атанасов, тие донесоа свежина во средниот ред. И од првиот прекин, во 70. минута, дојдовме до погодок. Енис Барди изведе слободен удар од дваесет и пет метри и погоди во мрежата на Ерменија за 1:0, а само девет минути подоцна, Бојан Миовски стави печат на победата откако ги надмудри дефанзивците на Ерменија и го зголеми водството на Македонија на 2:0.
Македонија дуелите во Лигата на нациите ќе ги продолжи во октомври со две гостувања. На 10 октомври, нашиот национален тим гостува кај Летонија, па три дена подоцна следи гостински натпревар и кај Ерменија.

