Извршниот директор на кошаркарскиот состав МЗТ Скопје, Филип Ѓоревски, в пресрет на првиот сезонски меч во АБА 2 лигата со екипата на Теодо Тиват (18.00), беше гостин на програмата на Спортско радио 90,3 ФМ.
„Во текот на летото се обидовме да ја исполниме желбата на стручниот штаб и затоа обезбедивме подолг ростер. Вративме наши поранешни кошаркари и ангажиравме квалитетни странски имиња. Верувам дека со победа против Теодо ќе ја отвориме сезоната, затоа апелирам до сите љубители на кошарката да дојдат денеска во салата и да им дадат поддршка на момците“ – вели Ѓоревски.
„Не криеме дека имаме големи амбици. Ќе атакуваме на сите домашните трофеи започнувајќи од Супер купот кој не чека против Пелистер. Верувам дека ќе успееме преку АБА 2 да се вратиме во елитната конкуренција во Јадранската лига. Во домашни рамки, очекувам крајно интересно првенството иако реално гледано, МЗТ Скопје и Пелистер, отскокнуваат со квалитетот. Ме радува што другите екипи прават проекти што треба да ја вратат кошарката во повеќето наши градови. Верувам дека сите заедно треба да работиме за афирмација и на младите кошаркари“ – потенцираше меѓу другото Ѓоревски во интервјуто за Спортско радио 90,3 ФМ.
Комплетното интервју може да го проследите на следниот ЛИНК

