Првите луѓе на мак-кошарката денеска на средба со новинарите објавија дека се се укинува котизација за екипите кои се дел од Првата машка лига откако пред неколку дена беше потпишан договор за спонзорство со телекомуникацискиот оператор – „МТЕЛ“.
„Договорот е потпишан на една година со можност за дополнителна соработка за уште три. Со него се овозможува клубовите да бидат комплетно ослободени од трошоците за котизација и тоа првпат по 14 години. Нема да застанеме тука, нашите амбиции се тоа да го продолжиме и со Првата женска лига и во младинските лиги. Преговорите се во тек, се надевам дека тоа наскоро ќе можеме и официјално да го потврдиме“ – истакна генералниот секретар Владимир Георгиевски.
„Свесни сме за шпекулациите, сите сме запознаени како оди тој процес. Клубовите имаат притисок, ни се јавуваат ни кажуваат дека имаат притисоци, од кој и како, ќе видиме. Нема клуб на кој не сме помогнале досега, почнувајќи од младинци, па до последниот клуб во Првата лига. На тоа прашање сме мирни, работиме за доброто на македонската кошарка“ – одговори претседателот, Перо Антиќ, на новинарско прашање дали има најава за промени и ново раководство на КФСМ.

