Новиот прв човек на мак-фудбалот Масер Омерагиќ во својата прва изјава за медиумите најави дека веднаш ќе започне со работа, но исто така потенцираше дека не планира промена на селекторската позиција во А репрезентацијата на Македонија.
„Приоритетите се да имаме комплетна реконструкција на младинските категории каде работите не стојат добро. Ние не го искористивме пласманот на ЕП за да добиеме млади играчи. Таму стагнираме, имаме лоши резултати, па таму ќе направиме една реформа која во две години ќе покаже резултати. Сите треба да бидат расадник за репрезентацијата до 21 година, за потоа тие играчи да влезат во А-тимот.
За волја на вистината, не се размислува за промени во сениорската репрезентација. Ние бевме први во групата, немам намера да влечам нефудбалски потези. И покрај кризата во играта, ние бевме први во групата. Во март започнуваме со квалификациите, не планирам никакви промени, се ќе зависи од резултатите и игрите понатаму“, рече новиот претседател на ФФМ.
Најавени се промени во младинскиот фудбал, односно во младите репрезентации. Ова значи дека Македонија со Благоја Милевски на клупата ќе ги започне квалификациите за Светското првенство.

