Кошаркарите на Голден Стејт дојдоа до предност од 2:0 во финалната серија во борба за титулата со Кливленд. Голден Стејт го совлада Кливленд со 122:103 и во вториот домашен меч со тоа дојде до убава предност пред да се префрли финалната серија кај Кливленд.
Стеф Кари беше клучниот играч во победата на Голден Стејт. Тој продолжува да постигнува тројка по тројка и да се наметнува како еден од најдобрите стрелци во историјата на кошаркарската игра, а во натпреварот кој беше одигран синоќа од финалето на НБА лигата постави нов рекорд. Овој пат бекот на Голден Стејт го надмина Реј Ален според постигнати тројки во еден натпревар од финалната серија.
Ален го држеше овој рекорд со 8 тројки во еден дуел – во финалната серија меѓу Бостон Селтикс и Лос Анџелес Лејкерс во 2010 година. Осум години подоцна Кари постигна една тројка повеќе и официјално е број 1 во оваа статистика, откако при победата од 122:103 против Кливленд во вториот финален натпревар постигна 9/17 во шутирањето на тројки. Лидерот на Голден Стејт постигна вкупно 33 поени, 8 асистенции, 7 скока и 1 одземена топка.
Ова е уште еден рекорд за шутирање на тројки кој е во сопственост на Стеф Кари. Тој е Број 1 по постигнати тројки во една сезона (402), во еден натпревар од регуларната сезона (13), во плеј-офот за една сезона (98), во една плеј-офф серија (32). На овој натпревар Кевин Дурант постигна 26, а Клеј Томпсон 20 поени. За Кливленд Леброн Џејмс постигна 29 поени, 9 скока и 13 асистенции додека Кевин Лав реализираше 22 поени.