Маратонците од Кенија очекувано ги освоија главните награди на годинешниов – „Виз Ер Скопски маратон“. Победи Еванс Кипкемои Бивот кој патеката ја помина за 2.14.08 часа пред Џон Лагат и Хозе Руто Кипротич. Што се однесува до нашите, најдобар беше Александар Кираџиев кој успеа да го освои петото место.
Во женската трка победи Џедида Карунгу од Кенија која постигна време од 2.51.24 часа пред Марија Брајиќ (Хрватска) и нашата Адријана Поп Арсова.
Македонскиот атлетичар, Дарио Ивановски, го повтори успехот од претходната година откако победи на полумаратонската трка.. Тој обезбеди време од 1 час, девет минути и 10 секунди. Веднаш зад него трката ја завршија нашите: Атанас Анчевски и Милош Ранчиќ.
Кај дамите, Милјана Ристиќ немаше вистинска конкуренција и со резултат од 1.25.15 часа сигурно го освои првото место пред Амела Трозиќ од БИХ и Силвија Шимуновиќ од Хрватска.
Машкиот дел на трката на 5 километри помина во доминација на нашите. Првото место го освои Богдан Цветковски, втор заврши Крстијан Стојани а трет Леонид Вандевски.
Во конкуренција на жени, најбрза беше Креша Бакрачи од Косово пред нашите Марго Бојаџиева и Викторија Ѓорѓевска.