Меѓу гостите кои ги очекуваме во Скопје на ревијалниот ракометен спектакл насловен како „Легендите на сцена“, ќе биде и една од тренерските легенди на хрватскиот и светски ракомет, Лино Червар. Утрово со Лино разговаравме за неговото учество на настанот во СЦ „Јане Сандански“, а тој самиот ја потенцираше големината на истиот и важноста на македонскиот ракомет за целиот ракометен свет
„Со нетрпение очекувам да се собереме во Скопје повторно. Македонија е единствената земја во регионот и пошироко каде ракометот е спорт број еден. Тоа е нешто што е од исклучителна важност за ракометот како спорт. Оттука и важноста на овој настан кој треба да се одржи во Скопје. Ќе се соберат големи легенди на ракометот на едно место и ќе имаме уште една вечер за дружба и уживање“, потенцираше популарниот Лино.
Тој заедно со уште неколку легендарни стратези ќе бидат предводници на тимовите составени од големи ракометни имиња. Настанот како дел од прославата на 20-годишнината на Спортско радио 90,3 ФМ, ќе биде несекојдневна можност на едно место да ги собере и македонските и интернационалните ракометни ѕвезди.
Билетите за настанот се пуштени во продажба онлајн преку ticket.com.mk.

