Кошаркарската федерација на Македонија соопшти дека на нашата држава ѝ е доверена организацијата на Европското првенство за играчи до 16 години – Б дивизија, кое ќе се одржи во периодот од 5. до 16. август.
Во насока на дополнителна промоција на кошарката и нејзино доближување до што поголем број љубители на спортот, Кошаркарската федерација донесе одлука ова првенство, за првпат, да се реализира во два града – Скопје и Гевгелија.
Ова Европско првенство ќе биде можност младите кошаркарски надежи од повеќе европски земји да ги покажат своите таленти токму во Македонија, но и можност нашата држава уште еднаш да ја потврди својата посветеност кон развојот на младинскиот спорт.

