Повратникот во нашата ракометна репрезентација Филип Миркуловски имаше значајна улога на вчерашниот историскиот натпревар на Македонија против Данска.
Оваа победа не само што беше сензационална и оддекна во Европа тују им дава дополнителна самодоверба на нашите ракометари. Нема многу време за одмор , сега следува нов меч со Данска, но овојпат на гостински терен во Алборг.
„Можеби не планиравме да се пласираме на ЕП после овој меч со Данска, но сепак се случи тоа чудо, го победивме светскиот и олимписки првак. За мене лично, одамна немам победено репрезентација од Топ 3 во светот, па затоа ми беше многу мило што ја совладавме Данска. Одигравме одлично, тактички бевме добро подготвени, сите си ја знаеја својата работа, само треба да продолжиме во овој ритам и со оваа посветеност и да бележиме нови победи“, вели Миркуловски.
„Ние сме тука да им помогнеме на помладите, тие во иднина треба да ја преземат лидерската улога: Талевски, Велковски и Кузмановски како бековска тројка. Одиграа зрело, ние им помагавме и се функционираше одлично. Одигравме перфектно, ги затворивме сите приоди, потоа на Данска и беше тешко да фати ритам. Ние го диктиравме темпото и го добивме мечот. Што се однесува за мечот во Данска, сакаме да се покажеме во добро светло. Да покажеме одлична игра како и во Скопје, младите да одиграат на високо ниво, па ако ни се пружи шанса зошто да не победиме. Можеби на оваа средба нема да имам толку голема минутажа, но најважно е да играме добро“, изјави Миркуловски пред денешниот последен тренинг.

