КФСМ денес на прес-конференција го промовираше новиот селектор на кошаркарската репрезентација Драган Бајиќ кој ќе ја предводи машката кошаркарска репрезентација, а доаѓа на местото на Александар Тодоров на кого раководството на КФСМ не му понуди нова соработка, откако имаше неуспешните квалификации за ЕП.
Драган Бајиќ е петтиот странец, кој седнува на клупата на нашиот национален тим, а ќе има за задача да ги мине претквалификации за СП, а потоа и да ја врати Македонија на ЕП, каде последен пат игравме во 2015 година.
Новиот селектор на кошаркарската репрезентација во моментов е тренер на Игокеа, со која оваа сезона во АБА-лига се најпријатно изненадување.
Спортскиот директoр, Тодор Гечевски најави дека Драган Бајиќ доби четиригодишен договор, а самиот селектор искажа задоволство од понудената доверба.
„Благодарност за довербата, за секој тренер е задоволство да биде селектор на една земја. Среќен сум што ќе бидам селектор на Македонија. Дојдов со голема енергија, да направам добра работа. Ми рекоа четири години, но јас сакам да останам десет години. Рано е да зборувам за што како. Сите играчи ќе добијат шанса да играат, ќе се обидеме од секој да извлечам најдоброто. Се надевам на добра соработка, на репрезентацијата гледам како на семејство, мора сите да бидеме како едно, тоа е патот до успехот“, изјави на промоцијата Бајиќ.

