Идниот тренер на Рома, Жозе Мурињо веќе го избра играчот што го посакува за нападот на тимот од новата сезона, кога и официјално ќе ја превземе работата на клупата на римската „волчица“.
Според „Кориере дело Спорт“, Мурињо сака во својот состав да го има напаѓачот на Торино, Андреа Белоти. Во Белоти тој гледа совршен човек за нападот на Рома, а како менаџер на Тотенхем веќе се обиде да го привлече во Лондон.
Договорот на Белоти со Торино истекува во јуни 2022 година и иако има клаузула за ослободување од 100 милиони евра, таа важи само за потенцијалните купувачи надвор од Италија, а неговата цена е далеку под таа вредност и Трансфермаркт во моментов ја проценува на 40 милиони евра. Оваа сезона, 27-годишниот напаѓач има 12 голови и 7 асистенции на 31 натпревар во Серија А.
Сè уште не е јасно дали босанскиот ветеран Един Џеко ќе остане на „Олимпико“, но според италијанското издание, Мурињо нема ништо против 35-годишниот напаѓач да продолжи да биде дел од тимот, без разлика дали е тоа како можен партнер на Белоти или негов алтернатива.

