Вардар е во резултатска криза во Лигата на шампионите. По одличниот старт, тимот нанижа три порази во низа, а последниот беше синоќа од Кил (26:29).
По натпреварот во Скопје, тренерот Веселин Вујовиќ на прес-конференцијата даде коментар на средбата и не беше импресиониран од настапот на своуте ракометар.
„Честитки до Кил за заслужената победа. Ние пред натпреварот знаевме дека нема да играат тројца играчи и објективно се надевавме дека имавме шанси да дојдеме до добар резултат. Многу се мачевме во клучните моменти во нападот. Резултатот кој го имаме беше поради успешната одбрана и расположениот Томовски. Имавме страшни проблеми во нападот при играта „шест за шест“, шутерски бевме рамни на нула и бековите немаа свој ден. Се обидовме со „седум на шест“, игра која создава нервоза и кај нас на клупата и на трибините. Заминавме на три разлика и – застнавме! Не знам што се случи. Паднавме. Примивме 19 гола во вториот дел, тоа е премногу за Вардар и за мојата филозофија. Искрено мислам дека има некои играчи кои треба добро да се размислат дали од полусезоната ќе останат во Вардар, затоа што очекуваме повеќе од нив, ако Вардар сака да направи нешто повеќе и тие играчи треба да го оправдат доаѓањето во клубот“, изјави Вујовиќ.

