Дербито помеѓу Интер и Наполи кое требаше да донесе радост и среќа за навивачите не само на Апенините, туку и низ целиот свет, синоќа помина во ужасни сцени на расни навреди од трибините, а мечот во неколкку наврати беше на работ на прекин.
Навивачите на “нероазурите” не престанаа со навреди на расна основа кон ѕвездата на Наполи Калиду Кулибали, а лично тренерот на наполитанците Карло Анчелоти призна дека трипати побарал средбата да биде прекината поради овие грди скандирања од трибините на “Сан Сиро”.
„На три пати побаравме натпреварот да биде запрен поради расистичките скандирања. Имаше известувања од спикерот, но тие не престанаа да го навредуваат. Следниот пат кога такво нешто ќе се случи, ние самите ќе го напуштиме теренот, дури и ако тоа значи прекин на натпреварот и службен пораз за нас“, изјавил Анчелоти.
Кулибали беше исклучен во време кога неговиот тим притискаше за победа, откако доби втор жолт картон.