Тренерот на Реал Мадрид, Карло Анчелоти, по победата од 2:0 на домашен терен над РБ Лајпциг, одговори на прашањето за отсуството на лидерот на тимот Карим Бензема, кој се опоравува од повредата.
„Нашиот план за игра нема да се промени со Карим Бензема. Не сакавме противниците да го користат темпото во контранапад, како што знаат да го направат тоа. Што се однесува до Бензема, да видиме како ќе тренира во наредните денови, ако може. Во секој случај, нема да ризикуваме по ова прашање. Доколку Карим добро тренира во сабота, ќе се вклучи во неделниот натпревар против Атлетико“ изјави Анчелоти за официјалниот сајт на Реал Мадрид.
Синоќа, Реал Мадрид го совлада РБ Лајпциг благодарение на прецизните удари на Валверде и Марко Асенсио (во 80-та и 90+1 минута од натпреварот). Мадридското дерби против Атлетико ќе се одигра на 18 септември. Бензема се повреди на натпреварот против Селтик во 1.коло од групната фаза на Лигата на шампионите.