Селекторот на нашата фудбалска репрезентација, Игор Ангеловски го објави списокот на играчи кои треба да конкурираат за наста на евроквалификациските дуели против Словенија и Полска кои се најважни за нашиот национален тим во циклусот за пласман на ЕП 2020.
Повреден е само Велковски, Барди е неизвесен, па така, Ангеловски се надева дека со останатиот дел од тимот ќе може да им парира на протвниците и да победи против Словенија, а потоа да се надева на позитивен резултат против Полска.
„Списокот скоро во целост е истиот што беше на претходните натпревари. За жал, Дарко Велсковски не е во состојба да се стави на располагање и затоа отпадна. Во националниот тим се враќаат Ристовски и Тошевски. Бејтулаи нема да го имаме со Словенија, а ги чекаме последните наоди за Енис Барди затоа што тој има повреда на задната ложа. Верувам дека тимот ќе го издржи целиот терет и дека како тим ќе играме. Дуелот со Словенија ќе биде нашето најдобро издание, затоа што за нас ова е многу важен натпревар, но истовремено и дуел во кој ќе уживаме. Самите се донесовме во ситуација да се надеваме на она што ние во спомнавме“, изјави Ангеловски.
Во однос на нашиот следен противник, селекторот Ангеловски вели:
„Ирелевантно е да зборуваме пред меч кој е подобар, најважно е кој ќе победи. Може да победиме само ако сме како тим и ако играме како што знаеме. Не би можел да кажам како ќе изгледаме засега, дали ќе играме со четири во одбрана или ќе останеме исти. Словенија сите мечеви ги одигра со истите фудбалери. Истото и јас го практикувам. Менуваме само кога имаме повредени. Имаме неколку системи на игра кои во изминатите години ги користевме на натпреварите. Словенија е национален тим што има голман како Облак, лидер како Иличиќ, но очекувам една рамноправна битка, за секоја педа на теренот. Но јас верувам во овие фудбалери“, додаде селекторот.
Натпреварот меѓу Македонија и Словенија се игра на 10 октомври на Арената „Тодор Проески“ во Скопје. Првиот собир на националниот тим е закажан за 7 октомври, а првиот тренинг е од 18:00 часот истиот ден.