Нашата фудбалска репрезентација ја исполни својата цел, а селекторот на македонската репрезентација, Игор Ангеловски е задоволен од постигнатото на првиот натпревар.
По натпреварот со Гибралтар на официјалната прес-конференција Ангеловски изјави:
„По она што дојдовме, го остваривме. Почнуваме со три бода и со победа на стартот. Како што се договоривме, брзо отворивме и потоа заштедивме сили за мечот со Ерменија. За три дена имаме тежок натпревар и моравме да мислиме и на тој дуел. Пандев е многу важен фудбалер во нашата селекција, во неделата играше цел натпревар за Џенова, па токму затоа одлучив да го заштедам. На полувреме се договоривме да не се трошиме, со посед на топка да не му дозволиме на противникот да се закани. И минатиот циклус против Лихтенштајн имавме ваков пристап и момците верувам дека против Ерменија ќе го валоризираат овој триумф. Мислам дека ниту еден удар не ни упатија кон голот. Од овој момент ќе започнам да го анализирам натпреварот Ерменија – Лихтенштајн. Уште сега апелирам нашите навивачи да ни дадат поддршка в недела на натпреварот со Ерменија во Скопје“ изјави Ангеловски.
Македонската фудбалска експедиција денес треба да допатува во Скопје каде ќе се подготвува зе мечот со Ерменија.