Еден Азар ги отфрли информациите дека наскоро ќе потпише нов договор со Челзи. Белгиецот има договор со „сините” од Лондон за уште две сезони, но од клубот ќе направат обид да го продолжат договорот за уште две години. Во оваа фаза Азар нема намера да потпише, што ги зголеми шпекулациите за евентуален трансфер во Реал Мадрид.
„Не сум потпишал нов договор. Уште не”, рече Азар по победата со 2:1 над Ливерпул во Лига Купот, откако го постигна победничкиот гол за Челзи по одлична индивидуална акција.
Азар е задоволен од новиот стил на игра, кој го практикува италијанскиот менаџер Маурицио Сари, кој пак дојде на местото на својот сонародник Антонио Конте.
„Сари сака од нас да владееме повеќе со топката што ми се допаѓа и ми помага да играм подобро. Претходните менаџери (Мурињо и Конте) исто ми дозволуваа да ја држам топката на противничката половина, но сега напаѓаме повеќе, што е плус за играчи како мене”, изјави Азар.