Македонскиот каратист Матеј Белистојановски обезбеди пласман во финалето на Медитеранските игри во Таранто, во категоријата до 67 килограми. Белистојановски блеска во борбите и до финалето стигна со три убедливи победи.
Во осминафиналето македонскиот репрезентативец го совлада Алмасалмех од Сирија со 6:1, а во четвртфиналето беше подобар од Италијанецот Мареска со 2:0. Во полуфиналето следуваше уште една сигурна победа, овојпат против Балиотис од Грција со 5:1.
За златниот медал Белистојановски ќе се бори против Боран Берак од Хрватска. Македонскиот каратист има можност настапот во Таранто да го круниса со најсјајното одличје и да ја продолжи успешната серија со уште еден голем меѓународен резултат.

