Бенфика вечерва од 21.00 часот во Лисабон го пречекува Ајакс во првата 1/8 финална пресметка од Лигата на шампионите. Домаќините ќе имаат тешка задача да се соочат со тим кој на 33 натпревари постигна 108 гола.
Во текот на викендот, Бенфика прокоцка предност од два гола против Боависта во ремито од 2:2 по одличното прво полувреме и опуштањето во второто.
Ајакс се пласираше во 1/8 финалето по сензационалните шест победи во групната фаза, вклучувајќи го и триумфот против Спортинг со 5:1 во Лисабон.
Најголем придонес за овие победи имаше напаѓачот Себастијан Халер, кој постигна гол на сите шест натпревари и стана само вториот играч во историјата со вакво достигнување по Кристијано Роналдо во сезоната 2017/2018. Двата тима последен пат играа меѓу себе во групната фаза во сезоната 2018/2019. Тогаш Ајакс победи на домашен терен со 1:0, а мечот во Лисабон заврши 1:1.
Се очекува Португалците да дадат се од себе за да ги демантираат прогнозите кои го ставаат Ајакс како сигурен победник и тим кој ќе оди понатаму.
Сепак, избраниците на тренерот Верисимо мора да бидат внимателни, бидејќи дури петмина од нив може да го пропуштат реваншот во Амстердам. Станува збор за Грималдо, Жоао Марио, Отаменди, Рафа Силва и Вајгел. Кај Ајакс опасност за такво нешто има за Алварез и Тимбер.
Веројатни состави:
Бенфика: Влаходимос, Лазаро, Отаменди, Вертонген, Грималдо, Вајгел, Марио, Тарабт, Бернардо, Рафа Силва, Дарвин Нунес.
Ајакс: Пасвер, Блинд, Мартинез, Шуурс, Мазрауи, Гравенберг, Алварез, Тадиќ, Бергуис, Ентони, Але.