Раководството на Бешикташ официјално објави дека играчите на тимот нема да се појават за да го одиграат полуфиналниот реванш натпревар против Фенербахче од Купот на Турција.
Средбата беше прекината во 57-та минута при резултат 0:0, кога тренерот на Бешикташ беше погоден во главата од предмет фрлен од навивачите на Фенербахче. Турската федерација го разгледа случајот и одлучи дека двата тима треба да го доиграат натпреварот пред празни трибини на 3 мај.
„Веќе 115 години сме на фудбалските терени – сме победувале, сме играле нерешено или сме губеле. Но за да не влегуваме во улогата на губитници, донесовме решение да не се појавуваме за доигрување на натпреварот на 3 мај. Ја прифаќаме одлуката на федерацијата со тага и огорченост” , пишува во официјалното соопштение на веб-страната на Бешикташ. Првиот натпревар помеѓу двата тима заврши со резултат 2:2.