Многу клубови од Бундеслигата и лидерот во втората лига Хамбургер ќе се сретнат во среда во Франкфурт за да разговараат за иднината на германскиот професионален фудбал сред пандемијата на коронавирусот. Состанокот ќе биде неофицијален и во моментов 14 екипи го потврдиле учеството.
Според весникот „Билд ам Зонтаг“, дел од учесниците на овој неформален состанок се Баерн (Минхен), Борусија (Дортмунд), РБ Лајпциг, Борусија (Менхенгладбах) и Баер (Леверкузен). Претставници на Германската фудбалска лига (ДФЛ) не се поканети, пишува весникот.
Истата публикација додава дека екипите на Мајнц, Аугсбург, Арминија (Билефилд) и Штутгарт не се поканети. Мајнц, Аугсбург и Штутгарт, како и неколку други клубови од Втората Бундес лига, притискаат со постојани писма до Лигата за да го преиспита начинот на распределување на парите од ТВ-правата. Но, ова е само една од точките што ќе бидат разгледани. Другото што очигледно ќе биде подготвено е замена на претседателот на Лигата, Кристијан Зајферт, чиј договор е до 2022 година.

