Челзи ќе мора да игра без повредените Хаким Зијеш, Бен Чилвел и Кристијан Пулишиќ во натпреварот против актулениот шампион Ливерпул во недела. Ова го откри на прес-конференцијата пред натпреварот менаџерот на „сините“ Френк Лампард.
Пулишиќ сè уште не се опоравил од повредата што ја заработи во финалето на ФА купот на почетокот на август, додека во оваа фаза надвор од комбинација се новајлиите Зијеш и Чилвел. Добрата вест за Лампард е подобрувањето на состојбата на централниот напаѓач Тимо Вернер.
Германецот имаше болка во ногата по мечот со Брајтон во понеделникот, но тој го надмина тоа и е подготвен да игра против Ливерпул. Се чини дека надвор од комбинација за оваа средба ќе биде уште еден од новите – дефанзивецот Тиаго Силва.
„Тиаго работи на неговата подготвеност, но мислам дека натпреварот со Ливерпул доаѓа прерано за него. Сепак, неговото присуство ќе биде многу важно за нашиот тим, бидејќи тој веќе ги презема лидерските позиции. Неговото доаѓање ќе му помогне на целиот тим”, објасни Лампард.

