Денеска започнува 28-то СП во ракомет, овој пат организатори се Полска и Шведска кои ќе ги пречекаат 32-те репрезентации кои ќе се обидат да направат најдобри резултати за себе. Првото Светско првенство се одржа во далечната 1938 година во Германија. Учествуваа само четири селекции, а титулата првак ја освои домаќинот. Се играше сосема различен ракомет од денешниот, таканаречен голем ракомет.
Секој играше со секого, а Германците забележаа три победи. Втора беше Австрија, а бронзениот медал го освои Шведска. Последна, четврта беше селекцијата на Данска. За следното СП се чекаше цели 16 години. Домаќини во 1954 година беа Швеѓаните, а како и на првото, титулата му припадна на организаторот. Бројот на тимови се зголеми од четири на шест, а се играше во две групи со по три селекции. Тоа беше последно првенство на големиот ракомет. Потоа следуваше промена и нови правила, не се играше на фудбалски терен и полека се префрлуваше на ракометот кој с еигра денес. Шведска, Франција и Романија со по четири шампионски титули се на врвот на вечната листа на шампиони , а следат Русија и Германија со по три.
Македонија е една од земјите кои во континуитет се натпреварува на големите натпреварувања, како што е случајот на Светските првенства. Има земји во Европа кои никогаш досега не учествувале на СП во ракомет. Дури дванаесет земји од нашиот континент никогаш не учествуваа на Светските првенства: Албанија, Андора, Белгија, Естонија, Ирска, Латвија, Лихтенштајн, Малта, Молдавија, Монако, Сан Марино и Велика Британија.
Германија е земјата која имала најмногу можности да биде домаќин на Светските првенства, досега седумпати ја имале таа улога.