Селекторот на Светскиот шампион Франција Дидие Дешамп веќе може да биде горд на два стадиони кои го носат негово име. Ова стана факт, откако вчера објектот „Стад маркет” во Монако беше преименувано во „Стад Дидие Дешамп” во чест на титулата од Мундијалот 2018.
Причината за изборот на овој стадион, кој е само на неколку метри од „Луј II” на локалниот тим Монако, е тоа што токму тренерот живее во регионот од 2001 година, кога во тоа време го водеше овој тим. Како што е познато, веќе постои стадион кој го носи името на Дешамп во Бајон, каде што е родното место на Дешамп.
На официјалната церемонија присуствуваа 500 лица, освен самиот селектор, таму беа неговата сопруга Клод и неговиот син Дилан, кои му беа голема поддршка ова лето ога ја освои титулата на СП во Русија.
„За мене и моето семејство е голема чест што нашето семејно име ќе биде поврзано со овој убав стадион. Најважни се младите фудбалери. Се радувам кога гледам насмевки на нивните лица, солзи радосници и среќа, тоа е она што ми е многу важно”, рече Дешамп на свеченоста.
Дешамп е еден од само тројцата (заедно со Марио Загало и Франц Бекенбауер), кои станале светски шампиони и како играч и како селектор. Ова тој го постигна на Мундијалот 1998 како капитен на Франција и на светското првенството ова лето како нивен селектор.