Напаѓачот на Рома Един Џеко сака да се врати во Премиер лигата, иако само пред околу една година го одби трансферот во Челзи и се определи да остане на „Олимпико”.
Сепак, според англискиот весник „Мирор“, тој се премислил и сака да продолжи да игра на Островот повторно во јануари, каде што претходно ги бранеше боите на Манчестер Сити.
Интерес кон него не недостасува и неговото име се поврзува со релативно скромни тимови како Саутемптон, Кардиф и Кристал Палас кои се подготвени да платат добра сума за да го привлечат во своите редови во зимскиот трансфер период.
Сите три екипи имаат проблеми со постигнување на голови и со ангажманот на Босанецот гледаат потенцијално решение за нивните проблеми во нападот.
Џеко не е во најдобра форма и успеа да постигне само два гола во седум натпревари во италијанската Серија „А“ оваа сезона, но затоа покажува дека ја подигра формата со настапите за својата селекција БиХ каде синоќа постигна два гола за победата од 2:0 против Северна Ирска.