Уругвајскиот напаѓач Единсон Кавани изјави дека нема поим каде ќе игра во новата сезона. 35-годишниот играч е слободен играч откако неговиот договор со Манчестер Јунајтед истече на крајот на јуни, но тој допрва треба да потпише со друг тим. Според печатот во Шпанија и Франција, интерес за него има од Валенсија и Виљареал, како и од Ница.
„Во моментов не знам каде ќе играм оваа година. Се чувствувам одлично, но така е во фудбалот. Важно ми е да стигнам до место каде што навистина ќе бидам посакуван и да добијам самодоверба”, изјави Кавани.
Во текот на изминатите две сезони, Уругваецот доби малку шанси да настапува во Манчестер Јунајтед поради честите повреди и присуството на други ѕвезди во нападот на „црвените ѓаволи“. За време на неговиот престој на „Олд Трафорд“, тој постигна 19 гола на 59 натпревари, но само два од неговите гола беа постигнати во последната сезона.
Кавани во кариерата има вкупно 372 гола на 645 натпревари за Данубио, Палермо, Наполи, Пари Сен Жермен и Манчестер Јунајтед.