Египетската ѕвезда Мохамед Салах не планира да ја заврши кариерата во репрезентацијата. Ова го изјави на прес-конференција селекторот на тимот Ектор Купер по поразот со 1:2 од Саудиска Арабија во последниот натпревар на тимот од групата „А”.
Египетските играчи не успеаја да освојат поени во трите натпревари и го завршија натпреварувањето во групната фаза.
Медиумите објавија дека Салах може да го напушти националниот тим по Светското првенство. „Го познавам Салах. Не мислам дека ќе си замине од тимот. Можеби ова се само гласини. Не мислам дека тој рекол такво нешто”, изјави Купер.
„Салах играше прекрасно на денешниот натпревар. Понекогаш не може да го направи она што знае, понекогаш може да очекувате повеќе од него, но тоа не е секогаш можно. Тој е столбот на тимот”, додаде Купер.
Салах беше избран како играч, но не се појави на прес-конференцијата по натпреварот. Купер рече дека му е потребна медицинска помош. „Тажен сум и разочаран, бидејќи изгубивме од Уругвај со гол во 90-тата минута и денеска во 95-та. Игравме добро, но не постигнавме добри резултати. Загубивме на трите средби, но во две од нив со голови во последните минути. Но, на светско првенство играте против најдобрите тимови во светот “, рече селекторот на Египет.