Холандскиот фудбалски гигант Ајакс се квалификуваше во плеј-офот колото од Лигата на Европа, откако успеа да слави во епскиот пенал-рулет против грчки Панатинаикос во кои беа изведени неверојатни 34 пенали. Ајакс во регуларниот дел загуби со 1:0, а откако и во продолженијата не успеа да се реши победникот, мечот отиде на пенали, по што Ајакс победи со неверојатни 13:12.
Вистинскиот спектакл започна со промашување на Даниел Манчини за Панатинаикос, по што следуваа девет последователни успешни удари за двете екипи, па така се дојде до решавачкиот десетти пенал, со кој Брајан Броби можеше да го испрати Ајакс во баражот, но тој не успеа да постигне гол.
Така, двата тима продолжија од серија во серија со четири последователни промашувања. Откако никако не успеаваа да го решат победникот, следуваше нова серија од 14 успешно изведени пенали во низа, до промашувањето на Филип Младеновиќ од ПАО, па потоа и уште едно промашување на Броби. Тони Вилена промаши втор пенал во низа за Грците, а со 34. изведување од белата точка, Антон Гаје го испрати Ајакс во плеј-офот на Лига Европа.
Ова беше второто најдолго изведување пенали во историјата на европските натпреварувања, а првото место и натаму го држи пенал-рулетот меѓу Гзира Јунајтед и Гленторан од минатото лето во кое на крајот конечниот резултат беше 14:13.

