Столе Димитриевски ужива во минутажата која ја добива како прв голман на македонската репрезентација и од натпревар во натпревар го покажува својот квалитет, а посебно воодушеви на вчерашниот меч против Белгија на кој беше последен столб во перфектната одбрана на нашиот тим.
Димитриевски во Македонија ги добива сите шанси кои му недостасуваат како член на Валенсија, но неговото ново брилијантно издание за националниот тим не остана незабележано во Шпанија.
Угледниот медиум од Валенсија, „Супердепорте“ го пофали македонскиот голман за перфектното издание против фаворизираната Белгија, па иако честитка пристигна и од Валенсија како клуб, најинтересни се пораките кои пристигнуваат од фан страните од овој дел од Шпанија.
Навивачите на Валенсија од стартот на сезоната не се премногу задоволни од партиите кои ги прикажува Хулен Агиресабала, па фан страните почнаа да испраќаат барања Столе да добие шанса како прв голман од Карлос Корберан.
Со оглед на квалитетот и искуството кое го поседува, Димитриевски дефинитивно заслужува таква шанса од тренерот на Валенсија, а дали Корберан ќе попушти и ќе ги прифати барањата на фановите, останува само времето да покаже.

