Со присуство на 55 од вкупно 58 делегати денеска во скопскиот хотел „Хилтон“ се одржа редовното годишно Собрание на Фудбалската федерација на Македонија. Меѓу точките на дневниот ред и одлуките кои беа донесени се издвојуваат финансискиот извештај за 2021 година, според кој ФФМ
остварила приходи од околу 19 милиони евра, што годината која е зад нас ја прави една од финансиски најсилните за нашата куќа на фудбалот.
Според извештајот, ФФМ минатата финансиска година ја затвори со плус од нешто над 4 милиони евра.
На Собранието свое излагање имаа и преставници на ФИФА и УЕФА кои ја истакнаа одличната соработка со ФФМ и ги потенцираа одличните резултати на зелениот терен и надвор од него.
На денешното Собрание беше направена и измена во системот на натпреварување за сезоната 2022/23, со тоа што двете Втори лиги ќе бидат споени во единствена Втора лига. Истата ќе брои 16 клуба, а комесарот за натпреварување Игор Франговски потврди дека Првата лига останува со 12 клубови.
Според донесените измени, две екипи кои ќе испаднат од Првата лига, двата тима кои ќе бидат поразени во баражите за пласман во Првата лига, 10 клуба од сегашните две Втори лиги со пласман од третото до седмото место и 2 екипи кои ќе бидат победници во баражите за влез во Втората од третите лиги, ќе ги пополнат оние 16 места за новата единствена Втора лига.